Sempachersee-Wanderung vom 28. August 2016
De André het sich das Johr di heissischte Sonntige för sini Wanderige usgsuecht!! Das erinneret mech fescht a mini Chindheit. Wandere i dere Hitz, oje!! Aber im chüele Zug über Luzern, get‘s in Sempach zerscht es Kafi und Gipfeli.
Denn goht’s los in Richtig Sempachersee em Ufer noche. Leider müend mer hender de höche Häg dure laufe, vel Velofahrer send hüt au no met Chind und Chegel underwägs. Alles isch private Seeastoss, aber zwöschetdure erhasched mer doch en Blick uf de See.
Zyt vergoht bem Plaudere ganz schnell und scho send mer be de Badi acho. Schön am Schatte findet mer en Sitzplatz förs Zmittagässe.
En erfrüschende Schwumm im See loht eus d’Hitz vergässe. - In Estavyer am Schwingfäscht händs nur en Brunne!! -
Witer gohts verbi am Paraplegikerzentrum Nottwil. Semmer doch froh, goht’s eus guet und möged mer laufe.
Es Windli chunt uf, d’Segelschiff nämed Fahrt uf.
Dur grossi Oepfelplantage erreiched mer Sursee. Das schmucke Städtli isch fascht usgschtorbe, es send wohl alli am Bade. Mer findet es Gartebeizli, wo de chüel Gerschtesaft scho i de Kehle verdunschtet.
No 10 Minute s’Städtli ab bes zum Bahnhof, wo mer de Zug über Olte nämed. Müed und verschwitzt chömed mer in Neuehof a.
André vele Dank för di guet Organisation und de schöni Tag.
Berg Frei, Susi
Bericht von Susi Etter
→ zu den Bildern