Pfingstreise 11. - 13. Juni 2011

 

Jo, jo, es isch nüm so eifach so e Tourebricht z kreiere, aber trotzdäm möchti kei Zyt verliere,
Früeufstoh isch jo für Naturfründe gar nüt neus. De Superbus samt Chaufeur wartet jo bereits.
Und wenn ou es paar Rägetropfe as Outofänster chlopfe, mit Schirm, Scharm und Wättergott
beschwöre, wärs nid gloubt, das Rezäpt das wird sech (fasch) 100 % bewähre.
Und scho git's s erschte „Highligth“ --- und das isch nid gloge, das cha me nur bi Heiri Reise ha,
e Riesejumbo z filme bim Aflug churz vor Klote. S Stune isch gross und s Foti famos.
D Fähre vo Konstanz uf Meersburg, los die Leine!! Seechrank worde isch gloubi keine.
Wiiter richtig Mecklenbeuren, Minimondus Bodensee. Die ganze Wältsehenwürdikeite
chasch in Mini gseh. Was, wo, wotsch luege wird fasch zur Qual und zletscht no im Kino
Memmingen, weisses Ross, übers Hotel git`s nid viel z säge Zimmer guet, Dusche z chli,
Ässe beschtens, hilfs Chällner rekrutiert (us eigene Reihe chunt gläge).
Der Abig het de öppis wahnsinnigs chönne bringe.
Die Stadtfüerig mit de verzwieflete Wiiber vo Memmige, wo Klatsch und Tratsch us em
17. Johrhundert so richtig gemein hei chönne bringe. Si hei richtig giftelet und ghässelet
unverdrosse. Mit dere es bitz andere Stadtfüerig het Heiri Reise der Vogel abegschosse.
Pfingstsunntigmorge, ihr wärdets gseh, s wird wieder e intressanti Exkursion gäh.
Me chas gloube oder nid, mir mache e 4 Schanzetournee. D Sprungschanze vo Oberstorf
wo me vom TV nur kennt, Erdinger Arena wird si nach em Sponsor ou gnennt.
Für Erklärige und Informatione isch si beschtens bereit die jungi, hübschi sportlichi Maid.
Und de d Oberstorfer Schopping meile isch doch gäbig zum Lädele und verweile.
D Rückfahrt dür's Allgäu, s Logo vo üserer Tour, viel Strosse, viel Kreisel und viel
wunderschöni Natur.
Mäntig isch worde, s heisst Koffere packe, Liechter lösche, Schlüssel abgäh,
Portmonaie sueche und anderi Sache. Aber ufem chürzeschte Wäg hei, das wei mer doch nid,
will's no einisch e intressante Abstecher git. Uf Bezau, zur Abwächslig uf d Schine, es bitzli
Nostalgie, (gottlob isch es nid der Cisalpino gsi).
Nach dem Sitesprung uf däm Nostalgiespürli, nach Dornbirn si mer gfahre,
im 4 Sterncar natürli.
Es tuet sech jo öppe mol es Hüngerli mälde, und agschribeni Hüser, die si ou nid sälte.
D Schwiiz het is wieder , und d Fränkli ou und der Himmel isch viellicht es bitzli weniger grau.
So wagemer de hurti, es geit so schnäll, e abstecher is heimelige Dörfli Appezell.
Und de isch öppe langsam fertig mit Schlof s geit jetz ohni Halt bis Neuehof.
Jetz hoffeni nume, dä Bricht mach e aständigi Gattig für d Erinnerig i d Naturfründebrattig.
Dank heigit Fritz Gärber vo de Heiri Reise als Lohn. Dank heigit s Etters de Supperorganisation
und i säges es gsehts doch jede ii, das isch doch gwüss es gäbigs Schuelreisli gsii.

Bericht von Rosmarie Irniger

zu den Bildern